Synoptica divisio seculo XVI & XVII. maxime in usu fuit.

Systematica vero seculo XVIII. praecipue exculta fuit, incepta a Tournefortio & Rivino.

Methodici summi methodo mathematica, in scientia naturali, a simplicioribus ad composita adscendunt, adeoque incepere ab Algis, Muscis, Fungis, uti Rajus, Boerhaavius, &c.

Naturalis instinctus docet nosse primum proxima & ultimo minutissima, e. gr. Homines, Quadrupedia, Aves, Pisces, Insecta, Acaros, vel primum majores plantas, ultimo minimos Muscos.

Natura ipsa sociat & conjungit Lapides & Plantas, Plantas & Animalia: hoc faciendo non connectit perfectissimas Plantas cum Animalibus maxime imperfectis dictis, sed imperfecta Animalia & imperfectas Plantas combinat, e. gr.
Lernaeam Animalculum & Confervam Algam.
Spongiam Algam & Corallia Animalia:
Toeniam, Conferuam, articulatam, Corallinam.
Lythoceratophyton B. intra Vegetabile, extra Lapideum, ex Animali.