Partes plantarum in descriptione aeque distinctae evadant ac in ipsa planta.

Majusculis literis pingantur omnes partes plantae, at partium partes minusculis, & a vulgaribus diversis.

Usus inde resultat, quod non modo partes a Lectore facilius reperiantur, sed & quod omissa facilius in descriptione perspiciantur.

Taediosius nihil descriptione amplissima, quam nec paragraphi, nec majusculae literae, secundum partes plantae, distinguunt.

PASSIFLORA foliis trilobis cordatis pilosis, involucris multifido-capillaribus. Amoen. academ. 228.

Radix fibrosa, annua.

Caulis teres, plus quam humanae altitudinis, debilis: Pilis patentissimis, inaequalibus, albis adspersus. Rami supra axillas spatio remoti, caulem structura imitantes.

Folia alterna, remota spatiis longitudine foliorum, cordata, obsolete triloba, basi quinquenervia, venosa: venis diaphanis, integerrima, obscure ciliata: Setis glanduliferis; Pilis erectis albis, utrinque adspersa; ante explicationem triplicata.

Petioli teretes, similiter pilosi, patentes, folio dimidio breviores, supra parum planiusculi; glandulis subulatis, alternis, erectis, longitudinaliter dispositis in supina parte.

Stipulae lunares, amplexantes caulem, persistentes, nudae ciliatae: glandulis subulatis, longitudine stipularum.

Cirrhi filiformes, patentes, axillares, pilosi, supra medietatem spiraliter convoluti & revoluti, foliis longiores.

Pedunculi axillares, cirrho laterales, solitarii, erecti, teretes, petiolo breviores, pilosi, terminati involucro.

Involucrum triphyllum, lineare, pinnatifidum, pilosum, ciliatum glandulis subulatis, persistens, uniflorum.

Flos sessilis, calyce pentaphyllo, piloso, mucronato &c.