Veterum icones sistunt maximas Arbores & minimas Alsines sub eadem magnitudine; Procumbentes & Repentes plerumque erectas pingunt, quod sedulo vitandum.

Cum magnitudo nequeat depingi in plantis maximis, praestat Ramulum porrigere; & plantam integram in compendio juxta partem sistere; uti Ehret in Napaea t. 8. Hibisco t. 6. Verbena t. 14. & Martynia t. 1.

Fundamentales figura §. 11. praesertim Plumerianae, facillime elaboratae, plantas optime repraesentant.

Ligneae figurae §. 11. olim usitatissimae, praesertim Rudbekianae, certabant cum aeneis, sed opera Botanica reddidere minus pretiosa; nunc antiquatae sunt non sine impensis Botanicis.

Pictor, Sculptor & Botanicus aeque necessarii sunt ad figuram laudabilem; Si alter horum peccet, evadit figura vitiosa. Hinc Botanici, qui una exercuere artem & pictoriam & sculptoriam, praestantissimas figuras reliquerunt.