HORTUS.

Hortus Botanicus, PARADISUS dictus, alat plantas numerosissimas.

HYBERNACULA pariete fenestrato, plagae meridionali obverso, plantas ab hyemis saevitia defendant.

CALDARIUM Caminis tribus, Scamnis Pulvillo, fenestris juste inclinatis pro plantis Feris. Thermometr. 12-36.

Tepidarium Caminis duobus, Scamnis gradatis pro plantis Aethiopicis, Succulentis. Thermometr. 4-12.

Frigidarium Camino unico, spatiosissimum aestate pro Demonstrationibus, hyeme pro Pl. Mansuetis. Thermometr. 2-10.

Museum oblongum, altum, angustum, a tergo horum.

Animalia in vitris spiritu vini repletis.

Lapides in Lithophylacio apto servandi.

AEDES Hortulani & Professoris proxime adsint.

AESTIVARIA hybernaculorum minimorum instar inaedificata, plantas ab aestatis injuria defendant.

VAPORARIUM ventre equino Cortice obtecto, in ollis, seminum caldarii pullitiem promoveat.

SOLARIUM, Scamnis gradatis, Ollas plantigeras apricabitur, noctu claudendum fenestris, pro Aethiopicis.

AREAE singulae includantur sepibus vivis, opere topiario formatis.

PERENNIS spatiosissima, divisa in Pulvillos aequales, restibiles, alat systematice herbas perennes Cicures vel etiam Vulgares.

ANNUA spatiosissima ut praecedens, divisa in Partes duas novales, aequales cum pulvillis numeris adscriptis plantis.

MERIDIONALIS e frigidiario plantas Mansuetas excipiat aestate, a frondescentia Querci ad florescentiam Colchici.

VERNALIS instructa Pariete a plaga boreali, pro plantis scandentibus & Delicatulis.

AUTUMNALIS pro plantis Rarioribus, hyeme obtegenda Musco & Foliis.

AQUARIA effossa pro plantis, cespite vivo circumdata.

FLUVIATILE aquas (si liceat) motu agitatas vehat.

LACUSTRE aquam stagnantem, profundam contineat.

PALUSTRE aquam, imbribus inundantem, fundo limoso admittat.

ARBORETA defendant plagas a procella, nec umbra noceant, digesta in Quincunces Ambulacra, Mapalia, Pergulas.

OCCULTUS sit locus pro Instrumentis, Ligno, Fimo.

USUS vivae plantae a Professore demonstrantur.

Specierum collatio primaria est.

Pretiosa itinera evitantur, dum plures exoticae occurrunt in uno Horto, quam facile per totam Europam spontaneae.

(*) Ferae quae toto anno intra domum servandae; Mansuetae quae aestate exeunt; Cicures quae ferunt clima nostrum hybernum.