Philosophia Botanica | Tabulae, Instructiones | Metamorphosis
METAMORPHOSIS VEGETABILIS.
Radix deorsum; Herba sursum tendit.
Herba omnis est processus substantiae medullaris Radicis.
Flos terminat, Foecundatio separat, Semen incipit omnem plantam.
| Terminus plantae idem, | vel vita continuata in Gemma. |
| vel propagata in Flore. |
Gemma fines, Semina initia plantae defendunt a climatis duritie.
Gemma est Hybernacululm herbae, Semen ejus capsella.
Gemma conservat embryones intra squamas, Semen intra tunicas.
Gemmiparae non minus sunt perennes herbae quam Arbores.
Meridionales arbores nequeunt esse boreales ob gemmas.
Perennis planta gaudet duplici flore: altero antecessore triumphante; altero successore occulto.
Gemma aut gemmulis aut floribus aut utrisque gravida est.
Plumulam seminis saepius terminat aut flos aut gemma.
Principium florum & foliorum idem est.
Principium gemmarum & foliorum idem est.
Gemma constat foliorum rudimentis.
Stipulae sunt foliorum appendices.
Perianthium sit ex connatis foliorum rudimentis.
Derivato nutrimento ad squamas amenti, destructis flosculis, mutantur in Folia.
Derivato nutrimento ad flosculos amenti, fiunt folia Calyces.
Luxurians vegetatio folia e floribus continuando producit.
Macra vegetatio flores e foliis terminando producit.
Gemmae vix frondescunt, nisi defoliata arbore vel foliis ex climate mutationem passis.
Gemmae saepius destruunt sequentis anni flores, exfoliata aestate arbore.
Gemmae annuo spatio praecociores evadunt, exfoliata aestate arbore.
Flos ex gemma, annuo spatio, foliis praecocior est.
* Amygdala sata in caldario producunt Folia alterna; at, spatio determinato, supra radicem, in gibbosiore caule conferta, loco determinato gemmae, ubi citatior propulsio superavit moram & revocavit futurum annum in praesentem.