Philosophia Botanica | Fructificatio | 120

120. MULTIPLICATUS (119) Flos de Corolla multiplicata, salvis quibusdam Staminibus communiter praedicatur, estque Duplicatus vel Triplicatus. Perianthium & Involucrum raro: Stamina vix unquam multiplicatum constituunt florem.

Distinguo Multiplicatum florem a pleno, quod in Pleno Corolla ita multiplicata est, ut staminibus vix ullus locus. Multiplicatus vero praedicatur de serie duplici, triplici aut quadruplici corollae auctiore.

Duplicatus flos adeoque primus & minimus gradus plenitudinis est.

Triplicatus corolla triplo auctior evadit.

Campanula fol. urticae, flore duplici & triplici. Tournef.

Stramonium flore altero alteri innato. Vaill.

Stramonium flore violaceo duplici triplicive. Tournef.

Monopetali saepius multiplicantur; rarius pleni evadunt.

Polypetali non raro multiplicantur; e. gr. Hepatica, Anemone.

Perianthium raro multiplicatum florem constituit.

Dianthus Caryophyllus spicam frumenti referens. E. N. C. cent. 3. p. 368. t. 9. in hoc squamae calycinae augentur in infinitum, ut constituant integram spicam modo singulari. vid. Hort. cliff. 164.

Gramina alpina plena evadunt, dum glumae in folia excrescunt: Festuca spiculis viviparis. Fl. suec. 94.

Salix rosea, ubi, destructis staminibus aut pistillis ab insectis, amenti squamae in folia enascuntur.

Plantago rosea, cum bracteae spicae excrescunt in folia.

Caveas ne Perianthium coloratum pro multiplicato sumas, licet sit gradus monstrositatis e. gr.

Primula prolifera odorata. Tournef.

Primula prolifera, flore majore. Tournef.

Primula prolifera, flore purpureo. Tournef.