Philosophia Botanica | Differentia | 276
276. Trunci (82) notae differentias saepe optimas edunt.
Caulis in multis plantis ita essentiales praebet differentias, ut eo demto, nulla certitudo speciei.
Caulis angulatus plures species distinguit, vix aliter distinguendas.
| Hypericum Androsaemum | Fl. suec. 626. caule tereti. |
| Hypericum perforatum | Fl. suec. 625. caule ancipiti. |
| Hypericum Asciron | Fl. suec. 624. caule quadrangulari. |
Convallaria Polygonatum vulgare Fl. suec. 247. a caule ancipiti.
Convallaria Polygonatum maximum Fl. su. 247. b.
caule tereti est.
hinc posterior Convallaria foliis alternis, caule tereti
pedunculis multifloris; prior Convallaria foliis alternis,
caule ancipiti, pedunculis unifloris dicenda est.
Hedysarum Fl. Zeyl. 286. caule triquetro notabilis.
Lupini species vix nisi per caulem, aliis simplicem, aliis compositum, distinguerentur.
Culmus quinquangularis & exangularis est optima differentia Eriocauli Fl. Zeyl. 48. 49. 50.
Scapus triqueter distinguit Pyrolas Fl. suec. 337. 332. a reliquis.
Petioli alati s. latere utrinque membrana aucti pulchre distinguunt Aurantium a congeneribus & Hedysarum Fl. Zeyl. 286.
Pedunculi diphylli s. foliolis duobus oppositis instructi, iisque capitulo subjectis, eleganter Gomphrenam Fl. Zeyl. 115. determinant.