Philosophia Botanica | Plantae | 80

80. RADIX (79) alimentum hauriens, Herbamque (81) cum Fructificatione (IV) producens, componitur Medulla, Ligno, Libro, Cortice; constatque Caudice & Radicula.

1. Radicula est pars Radicis fibrosa, in quam terminatur Caudex descendens, & qua Radix nutrimentum haurit pro vegetabilis sustentatione.
2. Caudex descendens sub terra sese sensim subducit, & Radiculas (A) profert, a Botanicis ex varia structura variis nominibus distinctus.
   1. Perpendicularis, qua recta descendit.
   2. Horizontalis, quae sub terra transversim extenditur; Iris.
   3. Simplex fig. 129. quae non subdividitur.
   4. Ramosa f. 130. quae in laterales ramos dividitur.
   5. Fusiformis f. 129. quae oblonga, crassa, attenuata; ut Daucus, Pastinaca.
   6. Tuberosa f. 128. quae subrotundis constat corporibus in fasciculum collectis: Paeonia, Hemerocallis, Helianthus, Solanum, Filipendula.
   7. Repens f. 131. quae longe excurrit & radiculas hinc inde dimittit.
   8. Fibrosa constat tantum Radiculis fibrosis.
   9. Praemorsa, quae deorsum truncata est, nec attenuato apice terminatur; ut Scabiosa, Plantago, Valeriana.
3. Caudex ascendens supra terram sensim se elevat, gerens saepius vices Truni, Herbamque (81) profert.

Arbores Fruticesque omnes itaque sunt Radices supra terram. Ergo Arbor verticaliter inversa, e caudice descendente, fert Folia, ex adscendente Radiculas.