Philosophia Botanica | Characteres | 209
209. Habitui plantarum (163) adeo adhaerere, ut rite adsumta Fructificationis principia (164) deponentur, est stultitiam sapientiae loco quaerere.
Inflorescentia s. Situs Fructificationis in axilla, racemo, corymbo (unde characteres habituales §. 168) caussavit infinita Genera falsa, praesertim Knautio, Kramero similibusque.
Facies plantarum Veterum lapis lydius, Recentiorum coticula, magni ab omni Botanico facienda est; sed & in his modus adsit.
Bidens (a) folio non dissecto Tourn. Fl. suec. 664. gerit fructificationem exacte genere Bidentis, ac BIDENS (b) folio non dissecto, flore aureis petalis undique radiato Moris. gerit fructificationem absolute Coreopsidis; quum a careat radio, b vero instruatur radio ex petalis 8 sterilibus, erit prior a Bidentis, b vero Coreopsidis generis. Sed dubium adhuc manet, numne planta radiata b sit varietas non radiatae a; quod si esset, uti verisimile videtur, non licet has duas plantas separare; nec consultum ducerem genera Bidentis & Coreopsidis in unum commiscere, ne limites generum tandem evanescant. Heic itaque facies & natura certat cum lege & arte.
Morisonus (§. 55.) secutus naturae filum, implicat suum ariadneum in Gordios solo gladio explicandos: e. gr.
| Classe | 7 | Liliaceis sociantur | Anemone, Dryas, Hydrocotyle. | |
| 5 | Leguminosis | - | Oxalis, Fragaria, Epimedium. | |
| 9 | Compositis | - | Eryngium, Bromelia, Cactus. | |
| 58 | Verticillatis | - | Asperifoliae omnes. | |
| 11 | Graminibus | - | Plantago. | |
Divisio in Arbores & Herbas videtur esse adeo naturalis ac in se fallacissima & lubrica (§. 78. 7.).