Philosophia Botanica | Differentia | 280
280. Fructificationis partes saepius constantissimas differentias subministrant.
Olim aliter sentii, nec fructificationem, nisi praeclusis aliis viis, adii, ob rationes, quod brevis aevi esset flos, & quod partes ejus saepius minutissimae.
Sunt in fructificatione plures partes, quam in tota reliqua planta; adeoque plures inde notae hauriuntur.
Minimis partibus per totum naturae campum, certitudo omnis innititur, quas qui fugit, pariter naturam fugit.
Distinguendae sunt fructificationis notae in Essentiales, Naturales & Specificas.
Tyro primum dissecans flores, observat speciales notas, format nova & falsa genera; credit se primum flores vidisse, sed maturus Botanicus factus, se saepius elusum sentiet.
Gentianae demto flore nequeunt distingui, uti constat observatis Cl. Halleri, at corollae in aliis Campaniformes, Rotatae, Infundibiliformes; Quinquefidae, Quadrifidae, Octofidae facillime distinguunt.
Hypericum floribus Trigynis a Pentagynis prope distinguendum.
Gerania africana dicta corolla irregulari, staminibus connexis, debent a congeneribus europaeis separari.
Lichenibus Tuberculum est fructificatio, constans punctis scabris, ex pulvere quasi congestis.
Scutellum est fructificatio orbiculata concava: margine undique elevato.
Pelta est fructificatio plana, margini folii plerumque adglutinata.
Muscis Capitulum est Anthera.
Fungis Pileus est orbiculus horizontaliter expansus, qui subtus fructificationes gerit.
Graminibus Spicula est partialis spica, quam Locustam dixere alii.
Tortilis est arista, cum geniculo contorto in medio notetur. E. gr. Avena.
Articulus est culmi pars Geniculis duobus interjecta.
Compositus Radiatus flos constat disco & radio.
Radius ex corollulis irregularibus in ambitu.
Discus ex corollulis minoribus plerumque regularibus constat.
Decompositus flos s. compositus ex compositis, continet intra calycem communem minores calyces, communes multis floribus: Sphaeranthus.
Corolla Aequalis ubi partes corollae figura, magnitudine & proportione aequales sunt.
Inaequalis, ubi partes non magnitudine, sed proportione respondent, ut regularis flos evadat: Butomus.
Regularis est aequalis figura, magnitudine & proportione partium.
Irregularis, quae limbi partibus, figura, magnitudine aut proportione diversa est.
Rictus est hiatus inter duo labia.
Faux est hiatus tubi corollae.
Palatum est gibbositas prominens in fauce corollae.
Calcar est nectarium ex corolla pone in conum extensa.
Urceolata, quae urceoli s. pelvis instar inflata & undique gibba est.
Cyathiformis, cum ex cylindro superne parum dilata est.
Connivens, cujus limbi lobi apicibus convergunt.
Lacera, cujus limbus tenuissime dissectus est.
Anthera versatilis & incumbens, quae latere adfigitur.
erecta, quae basi adfigitur.
Pericarpium Inflatum cum instar Vesicae cavum sit, nec repletur seminibus; Fumaria cirrhosa.
Prismaticum, cum lineare polyedrum sit, lateribus planis.
Turbinatum cum fructus basi angustatur: Pyrus.
Contortum, cum spiraliter contorquetur: Ulmaria, Helicteres, Thalictrum.
Acinaciforme, cum fructus instar cultelli compressus, altero angulo longitudinali obtuso, altero acuto est. Mesembryanthemum Dill.
Nidulantibus Seminibus T. cum semina in Pericarpio baccato per pulpam dispersa sunt.
Echinatum, cum aculeis s. spinis undique adspersum, uti Echinus animal.
Torosum cum torulis s. prominentiis hinc inde gibbum evadit; Lycopersicon T, Phytolacca.