Flos perfecte plenus nullus propagatur seminibus: ergo ipse prodit vel e depactis ramis, vel e viviradicibus; ut Dianthus, Lychnis, Hepatica, Cheiranthus, Tropaeolum, Rosa, Punica, Caltha, Ranunculus, Viola, Paeonia, Narcissus.

Pauci Flores, ut Papaver Nigella, potius multiplicati dicendi, quam perfecte pleni, semina perficiunt.

Luxuriantes flores multiplicant corollam cum damno staminum, quae excrescunt in petala; adeoque Multiplicati flores plurima, Pleni omnia stamina amisere. Multiplex ordo petalorum ideam praebet floris Multiplicati; at vero Nymphaeae, Cacti, Mesembryanthemi flores multiplicati non sunt dicendi, cum evadant tales absque damno staminum.

Sponsalia plantarum, qui de Sexu plantarum plura velit, adeat.