Caulis repens radiculas exserendo plerumque sese immense multiplicat.

Multiplicantur plantae vel in solo, vel in radice, vel in caule, vel in foliis, vel in fructificatione.

Frequens & Vulgaris dicitur planta, quae in solo apto sponte & copiose provenit.

Cespitosa planta fit, cum multi caules ex eadem radice prodeunt; hoc minus constans, cum cespitosa ceteroquin planta in solo macro unicum caulem difficile progerminare valet; e contra caulis versus radicem truncatus, in planta, quae unicum assolet producere, tum plurimos promit instar hydrae.

Fasciata dici solet planta, cum plures caules connascuntur, ut unus ex plurimis instar fasciae evadat & compressus. Fit idem arte, si plures caules enascentes cogantur penetrare coarctatum spatium, & paturiri tanquam ex angusto utero, sic saepe in Ranunculo, Beta, Asparago, Hesperide, Pinu, Celosia, Tragopogone, Scorzonera, Cotula foetida.

Beta lato caule C. B.

Amarantus cristatus.

Plicata dicitur Planta, cum arbor vel ramus excrescit minimis intertextis ramulis, tanquam Plica polonica ex pilis, ceu instar nidi Picae, quod vulgus a malo genio ortum arbitratur; frequens apud nos in Betula, praesertim Norlandiae, in Carpino Scaniae, nec infrequens in Pinu.

Crispa 83. 63. folia fiunt, cum foliorum peripheria augetur, ut circumcirca fluctuet quasi undatus limbus.

Bullata folia fiunt ex rugosis, cum discus (non ambitus) multiplicetur, ut inter rugas ascendat substantia instar conorum, subtus concavorum, uti plurimae Salviae, Ocymum.

Flores multiplicatos, plenos, proliferos ex simplicibus oriri, ex antecedentibus (119-122 150-271.) patet.

Varietates loco specierum sunt variae plantae, quae numero auctae sunt.

Ophioglossum lingua bifida, Barth.

Plantago spica bifida. Barth.